Über uns

Die Baseldytschi Bihni kann nur dank der ehrenamtlichen Arbeit von diversen Vereinsmitgliedern existieren. Derzeit zählt der Verein rund 1’600 Mitglieder. Davon helfen etwa 100 Aktivmitglieder auf, neben, hinter und vor der Bühne tatkräftig mit.

An dieser Stelle beschreiben sie sich gerne selber auf Baseldytsch:

 

Uff dr Bihni:

Uff dr Bihni sin die Aggdyyve wo Sii als Zueschauer alli kenne, s „Häärzstügg“ vo unserem Verein. Die Lüt investiere sehr vyyl vo ihrer Freizyt in s Stäggepfärd „Theater“. Uff „Neu-Dütsch“ saag ich däm: die hänn e „Fulltime-Hobby“. Sin das pro Saison doch eppe 60 Proobe-Eebe und nomool sovyyl Vorstellige.

 

Hinder dr Bihni:

Hinder dr Bihni schaffe all die Lyt wo neetig sin, dass die „uff dr Bihni“ könne spiile. Das sin d Tächniker (Belüchtig, Vorhang, Bihnemeister etc.) und natürlig au unseri Souffleuse wo baraat sin, sott epper „uff dr Bihni“ e Täggschtlugge ha. Hinder dr Bihni sin au die Lüt uffgfieert, wie z.B. dr Carl Miville als unsere Baseldytsch-Berooter, Kasse-Revisoore und sunschtigi Agdyyve, wo uns tatkreftig unterstütze.

 

Byyljeereservation:

Unseri guete Seele an dr Reservation versuche immer s Meegliggschte z mache, dass au alli wo in e Vorstellig wänn zumene Byyljee kemme. E seer e wichtigi Aarbet, wo seer vyyl Konzentration und Fingerspitzegfiel erfoorderet. Sin doch die Daame d „Visitekarte“ vo unserem Verein.

 

Garderobe und Restauration:

Die Daame und Herre soorge derfiir, dass es unsere Zueschauer wool isch in unserem Theater. Si nämme d Garderoobe entgege, biete s Programm aa und eppis z Dringge an dr Foyer-Bar, oder in dr Pause an dr Cüpli-Bar. Si soorge au ferfiir, dass alli zur Zyt iiri Plätz im Saal und uff dr Galerie finde. Es sin d Betreuer vo unsere Zueschauer. Au e seer e wichtigi „Visitekarte“.